Síðsta bríksl hevur ljóðað á Hálsi í Havn, har Føroyar í kvøld hava spælt EM undankappingardyst ímóti Rumenia.
Máltalvan vísir 31 – 21, og tað er einki at undrast á, at tað í føroysku leguni er talan um stórt vónbrot. Hálvleiksstøðan var 13 – 11 til Rumenia, og avrikið í fyrra hálvleiki kendist at leggja upp til, at talan fór at vera um spennandi seinna hálvleik.
Men soleiðis gekk tað ikki. Rumenia vann seinna hálvleik 18 – 10. Tá megnaði føroyska liðið ikki at fylgja við. Talan var um nógv mistøk í álopsspælinum, og tað kostaði fleiri mál í hinum endanum, umframt at verjuspælið ikki var so sannførandi.
Málmunurin var altso heilt lítil í fyrra hálvleiki, og tá skal havast í huga, at føroysku spælararnir misnýttu 10 av 21 skotum í fyrra hálvleiki. Rumenski málverjin var stinn, og føroysku spælararnir høvdu ilt við at skora. Eitt nú misnýttu Føroyar tvey brotskøst í fyrra hálvleiki, og eisini í seinna hálvleiki misnýttu Føroyar tvey brotskøst.
-Vit megnaðu ikki at varðveita góða avrikið í fyrra hálvleiki, og tað kostaði nógv í seinna hálvleiki, sigur Súna Krossteig Hansen, sum saman við liðfeløgunum er ógvuliga vónbrotin.
Ingi Olsen var viðmerkjari í KvF, og royndi venjarin, sum síðsta kappingarár vandi meistararnar í H71, setti spurnartekin við, um spælararnir, sum umboða føroysku feløgini, eru nóg væl fyri at spæla landsdyst væl eftir, at føroyska kappingin er av.
-Tað sást aftur í seinna hálvleiki, tá ið málmunurin eftir lítlari løtu fór frá at vera tvey mál og til at vera 7 – 8 mál, og so var tað bara spurningur um, hvussu stórur munurin fór at vera, sigur Ingi Olsen.
Leygardagin verður síðsti dysturin í hesi EM undankappingini, tá ið Føroyar fáa vitjan av heimsstjørnunum í Danmark. Í kvøld vann Danmark 38 - 22 á útivølli ímóti Eysturríki.
Føroyar – Rumenia 21 - 31 (11-13)
EM hondbóltur kvinnur
Mikudagin 20. apríl 2022 kl. 19.00 í Høllini á Hálsi í Havn
Rakul S. Wardum
Annika Fríðheim Petersen
Marianna Geirsdóttir Eystberg 5
Turið Arge Samuelsen 3
Nina Katrina Johansen 3
Lív Sveinbjørnsdóttir Poulsen 3
Maria Halsdóttir Weyhe 2
Pernille Brandenborg 2
Súna Krossteig Hansen 1
Ingibjørg Olsen 1
Jana Mittún 1
Elsa Egholm
Natasja Anjodóttir Hammer
Vár B. Zachariasen
Petra Andrea Larsen
Lív B. Zachariasen
Á beinkinum: Sonni Denis Vahlgreen Larsen, Finnur Hansson, Mladen Mjerimacka, Beinta B. Laursen
