Konsertin er vorðin fastur táttur hesa tíðina og hevur frá byrjan havt eitt greitt endamál:
at veita hjálp til fíggjarliga sperdar barnafamiljur í Føroyum.
Jólini – ein gleðistíð fyri øll børn
Jólini eru ein tíð við gleði og góðum minnum. Men veruleikin í Føroyum í dag er tann, at fleiri enn 1000 børn vaksa upp í fátækaváða sambært tølum hjá Hagstovuni. Fyri hesi kunnu jólini vera ein tung tíð merkt av stúran heldur enn ein gleðistíð. Fátækaváði merkir ikki bert trong fíggjarlig kor, men er eisini ein sosial avbjóðing, sum kann ávirka menning, sjálvsálit og trivnað hjá einum barni ella ungdómi.
Soleiðis verður jólahjálpin býtt út
Fíggjarliga sperdar barnafamiljur kunnu fylla út eitt umsóknarblað á heimasíðuni hjá Barnabata saman við einari stuttari frágreiðing um teirra fíggjarstøðu. Allar umsóknir verða viðgjørdar í trúnaði, og gávukort til mat og/ ella gávur verða latin teimum, sum liva undir fátækamarkinum. Tá umsóknirnar verða viðgjørdar, verða atlit tikin til, hvussu nógv børn og vaksin eru í húsarhaldinum, og hvørjar umstøður gera seg galdandi. Fleiri húski liva í fátækaváða í longri tíð, og onnur húski verða rakt av brádliga íkomnum støðum sum arbeiðsloysi, hjúnaskilnaði ella deyða – og kunnu tí hava tørv á serligari hjálp. Jólahjálpin verður borin út í samstarvi við Posta.
Hagtøl
Barnabati hevur við hjálp frá búskaparfrøðingi savnað inn hagtøl, ið lýsa støðuna hjá barnafamiljum í Føroyum. Hesi liggja tøk á heimasíðu okkara. Í 2024 fingu 325 barnafamiljur jólahjálp og 714 børn fingu ágóðan av stuðlinum. Somuleiðis fingu 25 børn játtað stuðul til føðingardagshjálp og hjálp til serligar merkisdagar í fjør - alt fíggjað av Í Menniskjum Góður Tokki við stuðli frá privatum og vinnuligum gevarum kring landið.
Soleiðis kanst tú hjálpa
Vilt tú hjálpa og stuðla fíggjarliga sperdum barnafamiljum, kanst tú stuðla á barnabati.fo. og til ber at stuðla alt árið. Stuðulin er týdningarmikil, tí hann er við til at fíggja hjálpina og geva familjum vón og gleði júst tá teimum tørvar tað. Størsti parturin av stuðlinum verður latin sum jólahjálp, og ein partur verður latin sum føðingardagshjálp og hjálp til serligar merkisdagar hjá børnum og ungum alt árið.
Um konsertina
Jóla- og stuðulskonsertin Í Menniskjum Góður Tokki er tikin upp í Havnar kirkju og verður víst í sjónvarpinum sunnukvøldið 30. november kl. 19.
Vit ynskja øllum barnafamiljum í Føroyum eini góð og hugnalig jól
Barnabati
