Sundabáturin var heilt suverenur

Tað sær út til, at Sundabáturin á ólavsøku fer at taka ímóti FM steypinum.

Í dag vann Sundabáturin heilt sannførandi sigur á Miðvági.

Fram ímóti málinum vóru tað fleiri enn tríggjar bátslongdir frá Sundabátinum og aftur til næstu avbjóðararnar.

Smyril úr Vági, sum í fjør vann FM, átti besta startin, og Smyril var støðugt við í kappingini um næstfremsta plássið, sum hann vann.

Víkingur hjá Havnar Róðrarfelag var dygst aftanfyri Smyril, og Hósvíkingur var minni enn ein hálvan skut aftanfyri Víking.

Fýra tær fyrstu ferðirnar í ár stóð kappingin um sigurin millum Sundabátin og Páll Fanga, sum eigur ein sigur frá fyrr í ár.

Í dag var Páll Fangi ongantíð í nánd av at taka seg út í kappingina um sigurin.

Tað lá heilt illa fyri hjá teimum á 6-mannafarinum úr Klaksvík. Fleiri av teimum, sum higartil í ár hava verið við til at manna bátin, noyddust at geva avboð, tí teir vóru raktir av koronustøðuni í landinum, og avrikið var sjálvandi ikki tað sama, tá ið fleiri nýggir og ikki so vandir loystu av.