Talið av fólkum, sum framvegis verður hildið at vera saknað av vatnflóð í Texas fyrr í hesum mánaðinum, er minkað munandi úr fleiri enn 160 til 3 fólk,Kerr County í Texas, siga myndugleikarnir í eini fráboðan.
Í fráboðanini stendur, at eftir drúgvt eftirfylgjandi arbeiði millum stats- og lokalar myndugleikar, eru nógv av teimum, sum upprunaliga vóru meldað saknað, staðfest trygg.
- Vit eru djúpt takksom fyri tey fleiri enn 1.000 lokalu, statsligu og samveldisligu embætisfólkini, sum hava arbeitt ótroyttiliga í kjalarvørrinum av oyðileggjandi vatnflóðini, sum rakti okkara samfelag, sigur býarstjórin í Kerrville, Dalton Rice, í eini fráboðan.
- Takkað verið teirra óvanliga átøkum er talið av fólkum, sum áður vóru skrásett sum saknað, minkað úr meira enn 160 niður í 3.
Nógv regn elvdi til vatnflóð í Texas fyrst í juli.
Regnið fekk ánna Guadalupe at renna yvir áarbakkarnar í amerikanska statinum.
Í minsta lagi 153 fólk doyðu í vatnflóðini, harav fleiri enn 36 børn.
Í Kerr County, sum varð harðast rakt av flóðalduni, vórðu líkini av 94 fólkum funnin.
Millum tey 94 eru í minsta lagi 27 gentur og leguleiðarar frá summarlegu, sum eitur Camp Mystic, hevur Greg Abbott, guvernørur í Texas, áður sagt sambært tíðindastovuni AFP.
Síðani kom fram, at myndugleikarnir í Kerr County - harðast rakta økinum í statinum - leingi hava tosað um at fáa nýggjar flóðávaringarskipanir.
Sambært New York Times vóru ongar sirenur ella ávaring, tá flóðaldan rakti.
Í staðin komu ávaringarnar sum sms-boð, har telefonsamband loyvdi.
Tom Moser, sum var kommisserur í Kerr County fram til 2021, sigur við New York Times, at ein nýggj ávaringsskipan kundi havt ávirkan.
Hon varð seinast umrødd í 2017, men uppskotið um nýggja ávaringarskipan varð vrakað, tí tað var ov kostnaðarmikið.
/Ritzau/
