U19-fótbóltslandsliðið hjá monnum er í hesum døgum í Ungarn fyri at spæla EM-undankapping, har mótstøðuliðini eru Frakland, Bulgaria og vertslandið, Ungarn.
Føroyar løgdu fyri í dag við torførastu uppgávuni móti bólkafavorittunum, Fraklandi.
Føroyar taptu dystin 0-4. Frakland legði seg á odda longu í áttanda minutti, og teir øktu beint undan steðginum. Tá ein stórur tími var leiktur høvdu fraklendingar økt til 4-0, men tá eydnaðist føroyska liðnum at steðga bløðingini.
Sambært heimasíðuni hjá UEFA hevði Frakland 15 málroyndir, meðan Føroyar høvdu tríggjar málroyndir, men bert eina innanfyri málrammuna.
Hini bæði liðini í bólkinum, Ungarn og Bulgaria leiktu javnt 1-1 í teirra dysti.
Leygardagin klokkan 17 spæla Føroyar móti vertstjóðini, Ungarn.
Fyrstu 11:
1 Tróndur Sjúrðarson (M)
2 Dávid P. á Líðarenda
3 Jens Eiler Samson
4 Jósef Ólavsson Gleðisheygg
6 Arnór Brandsson (L)
7 Aron Benjaminsen
8 Sjúrður Henriksen
10 Dávid Reynheim
16 Djóni Sivertsen
17 Dennis Anghel Olaru
18 Josva Signarsson
Kelda: FSF
