Lutur er nú drigin í Katowice í Pólandi um hvørji lið eru í bólki saman í U21-HM endaspælinum í manshondbólti í Grikkalandi og Týsklandi, ið verður leikt millum 20. juni og 2. juli.
Føroyar endaðu í bólki D. Hini liðini í okkara bólki eru Spania, Japan og Angola.
Við einum fullmannaðum U21-landsliði hava vit sera góðar møguleikar at knógva Japan og Angola á einum góðum degi.
Japan vann asiatiska U21-endaspælið. Angola bleiv nummar fýra í afrikanska U21-endaspælinum.
Spania er millum heimsins bestu hondbóltstjóðir og má átaka sær leiklutin sum favorittur í HM-bólki D. Spania vann í fjør U20 EM-endaspælið í Portugal.
32 lið kappast í HM-endaspælinum. Trý lið fara víðari úr hvørjum bólki til millumspælið, men tað ræður um at taka so nógv stig sum til ber við sær í millumspælið.
Vera vit við sterkastu manning eiga vit at hava ein góðan møguleika at vinna okkum í millumspælið.
