- Vit hava tikið Kherson aftur og so skjótt, sum russar flýddu úr býnum, byrjaðu teir miðvíst at leypa á býin.
Tað segði ukrainski forsetin, Volodymyr Zelenskyj, í einari talu á skundfundi í ST-trygdarráðnum í kvøld.
Hann lýsti russisku álopini sum skipað álop ímóti sivilfólki og sivila undirstøðukervinum í landinum, har stórir partar av Ukraina nú eru uttan el og rennandi vatn.
- Tá hitin fer niður um frostmarkið, er hetta hópoyðilegging, og hetta er brotsverk móti mannaættini, segði ukrainski forsetin.
Hann kom samstundis við einari bøn til trygdarráðið.
- Okkum tørvar effektiv verjuvápn í luftini, og vit heita á tykkum um at hjálpa okkum at tryggja mannalív.
Tað vóru USA og Albania, sum bóðu um skundfundin í ST-trygdarráðnum.
Orkumálaráðið í Ukraina upplýsir, at nógv tey flestu heimini í Ukraina hava mist streymin eftir bylgjuna av russiskum álopum í dag.
Seks fólk eru dripin, og í minsta lagi 36 eru løstað í russisku álopunum.
Ukrainski forsetin skrivar á Tvitter, at Russland fremur dráp av sivilum, oyðileggur sivila undirstøðukervið og fremur yvirgangsatsóknir.
- Vit ynskja eitt aftursvar frá altjóða samfelagnum upp á hesi brotsverk, skrivar Volodymyr Zelenskyj.
Tað er tíðindastovan NTB, sum ber hesi tíðindi í kvøld.
##med2##
