Hóskvøldið skal býráðið taka støðu til eitt uppskot um at samtykkja at heimila umsitingini at fara undir forkanningar um møguligar loysnir fyri eini eyka høll í Gundadali. Hetta skrivar Tórshavnar kommuna á heimasíðu síni í dag.
Í sambandi við samráðingarnar um yvirtøku av Gundadalshøllini í fjør varð gjørd ein støðulýsing av verandi høll.
– Høllini tørvar rímiliga umfatandi umvælingar komandi árini, siga tey úr kommununi.
Í sambandi við ætlan um at útbyggja er hugsanin at gera forkanningar viðvíkjandi ymiskum byggiloysnum, herundir loysnir við undanframleiddum bygningseindum, har kostnaðurin kann haldast niðri og byggitíðin kann styttast.
– Lendið norðanfyri høllina er í ávísan mun byggibúgvið frá byggingini fyrst í áttatiárunum, tá ætlanirnir upprunaliga vóru um eina dupulthøll. Hugsanin er bæði at kanna bygging av høll afturat verandi høll, og eisini at bygd verður nýggj dupulthøll.
– Kanningarnar verða gjørdar fyri at fáa betri grundarlag fyri politiskari støðutakan um framtíðar loysnir, við bæði fíggingartørvi, rakstri-og viðlíkahaldi og við funktión í huga, sigur kommunan á heimasíðu síni.
