Siglingin hjá Strandferðsluni skal ikki latast upp í hendurnar á privatum at røkja. Tað eru útoyggjafólk mestsum samd um, nú Johan Dahl, landsstýrismaður í vinnumálum, hevur lagt uppskot fyri Løgtingið sum loyvir honum at útveita sigling hjá Strandferðsluni til privat at røkja.
Seinastu dagarnar hava fólk á útoyggj, savna 220 undirskriftir, at mótmæla ætlanini. Sostatt eru útgoyggjafólk mest sum samd um at mótmæla, tí á nýggjárinum búðu bara 232 fólk á teimum útoyggjunum, Strandferðslan siglur til. Talan er um Fugloy, Svínoy, Kalsoy, Mykines, Hestur og Skúvoy.
Tær 220 undirskriftirnar eru nú handaðar Vinnunevndini hjá Løgtinginum, umframt Løgmanni og Landsstýrismanninum í vinnumálum.
Les eisini: Siga kortanei til at einskilja Strandferðsluna.
Samferðslan til útoyggjarnar er hjartað í búsetingini, siga tey. Tey mæla staðiliga frá, at flutningsskyldan hjá Strandferðsluni verður tikin av og at ruturnar verða lagdar í privatar hendur.
- Útoyggjarnar hava tørv á, at politiska skipanin bakkar tær upp, stuðlar undir menning og skapar grundarlag fyri bøttum umstøðum og búseting, siga útoyggjafólkini.
- Hetta uppskot ger tað øvugta, skapar ótryggleika og ótta fyri framtíðini, leggja tey afturat.
|
