Vágbingar ruddaðu borðið

Tað vóru sjey stig á muni undan ólavsøkuni. Tí var tað so at siga greitt, at Smyril úr Vági fór at vinna FM í dag.

Í fjør vann Royndin Fríða við dreingjum bæði á ólavsøku og FM. So væl hevur tað ikki stemmað í størru bátunum hjá vágbingum.

Setningurin hjá vágbingum var at vinna á ólavsøku. Tvær ferðir hava vágbingar vunnið FM og tapt á ólavsøku í størru bátunum. Soleiðis var tað hjá 8-mannafarinum Tofta Regin í 2017, og soleiðis var tað í 1980, tá ið 10-mannafarið Vágbingur vann FM.

Tí vóru vágbingarnir umborð á Smyrli so sera fegnir, tá ið teir fóru um málið og vunnu bæði á ólavsøku og FM.

Sundabáturin vildi ikki sleppa, men í endaspurtinum var eingin ivi. Smyril var fyrstur á mál, og Sundabáturin var næstfremst í dag og eisini í FM kappingini.

Merkisvert var tað, at Tindur úr Eysturkommunu vann bronsuplássið í dag.

 FM