Adrian R. Justinussen fekk fulla spælitíð, og Poul Kallsberg fekk góða 20 minuttir á vøllinum, tá Hillerød á heimavølli spældi oddauppgerð í næstbestu donsku fótbóltsdeildini móti Lyngby, ið hevur Dan Brimsvík sum høvuðsvenjara.
Dysturin endaði við 1-0 sigri til Hillerød. Saman Jalaei skoraði sigursmálið í 20. minutti við einum dreymahøggi. Adrian var við í uppspælinum til sigursmálið.
Talan var um seinasta kappingardystin hjá Adriani fyri Hillerød, nú hann skiftir til AC Horsens á nýggjárinum.
Lyngby hevði bóltin meira, og teir høvdu fleiri royndir á málið hjá mótstøðuliðnum, men tað rakk ikki til stig í kvøld.
Lyngby og Hillerød eru jøvn í oddinum við 32 stigum hvør. Lyngby hevur tó eina betri málúrtøku. Komandi liðið hjá Adriani, AC Horsens er fjórðfremst við 28 stigum.
HER ber til frá Viasat Sport at síggja sigursmálið hjá Hillerød.
Komandi kappingardysturin hjá Hillerød verður leiktur 1. mars í 2026. Tá spæla teir á útivølli móti AaB. Sama dag tekur Lyngby á heimavølli móti liðnum hjá Meinhardi E. Olsen, Kolding.
