Vilhelm Poulsen toppskjútti við 82 málum í 10 dystum

Vilhelm Poulsen hevur veruliga fingið sítt stóra gjøgnumbrot í Íslandi hetta kappingarárið.

Vilhelm hevur skotið heili 82 mál uppá 10 dystir í bestu íslendsku hondbóltsdeildini, eitt snitt uppá 8,2 mál pr. dyst sum er framúr gott.

Næstfremstur á máltindinum er Ásbjörn Friðriksson hjá oddaliðnum, FH sum hevur skotið 73 mál í 11 dystum.

Rógvi Dahl-Christiansen er eisini millum álitisspælararnar hjá Fram, og hann hevur skotið 36 mál í 10 dystum. 

Dánjal Ragnarsson hevur skotið 20 mál fyri ÍBV í 11 dystum, men Dánjal hevur seinastu tríggjar dystirnar skotið fýra mál og er komin so smátt í gongd við málskjótingini.

Ígjár spældi Fram javnleik 27-27 móti Afturelding á heimavølli. Vilhelm tók aftur yvirskriftirnar við at skjóta heili 12 mál, og Vilhelm tryggjaði eisini Fram javnleik við at javna til 27-27 í teimum allarseinastu sekundunum.

Rógvi skoraði trý mál fyri Fram ígjár. Í steðginum var støðan javnleikur 12-12.

Dánjal og ÍBV leiktu ein skuffandi javnleik 39-39 móti botnproppinum, HK. ÍBV var á odda 20-15 í steðginum. Dánjal skoraði fýra mál. Stigið var tað fyrsta hjá HK í 10 dystum.

Klokkan 18 í dag taka Nicholas Satchwell, Allan Norðberg, Pætur Mikkjalsson og hinir í KA móti Gróttu á heimavølli á Akureyri.