Jonhard Hammer
Vilja hava fleiri útlendskar leikarar
Nú hevur B68 lagt uppskot fram fyri aðalfundin hjá FSF um at hækka talið á útlendingum, sum kunnu spæla á hvørjum liðið. Sum er hava tveir útlendingar loyvi at spæla á liðnum, og er tað hesa kvotu, sum B68 vil hava hækkaða til fýra leikarar.
Niclas Davidsen formaður í B68 sigur, at grundin til at teir hava sent eitt uppskot til aðalfundin hjá fótbóltsambandinum er, at um feløgini úti á bygdinum skulu verða við í kappingini um at vinna meistaheitið, so verða tey noydd at fáa leikarar uttanífrá. Tað hevur víst seg, at føroyskir leikarar vilja ikki koma út á bygdirnar. Tað eru havnafeløgini sum lokka.
? Hetta er ein sera óheppin gongd, sigur Niclas Davidsen. Allir teir bestu leikararnir verða miðsavnaðir, og tað er ikki gott fyri føroyskan fótbólt.
? Fyri at sleppa undan at munurin á havnafeløgunum og hinum feløgunum verður ov stórur, mugu vit sleppa at styrkja okkum, heldur Niclas Davidsen.
? Og tá ið vit ikki kunnu fáa føroyingar, so verða vit noyddir at fara uttanlands.
Niclas Davidsen vísir á, at í Evropa kann ein hava so nógvar útlendskar leikarar, sum man vil.
? Og hví skulu vit í Føroyum ikki kunna hava fýra útlendskar leikarar. Og tað kann eisini hugsast, at sama lógin, sum er galdandi í Evropa, kemur í gildi í Føroyum . Tí vit luttaka í altjóða kappingum og skulu verða sum aðrar fótbóltstjóðir.
Av tí at ES er ein fríur arbeiðsmarknaður, ber tað til hjá fótbóltsliðum í ES-londunum at hava so nógvar leikarar úr øðrum ES-londum, sum teir hava hug til. Eitt nú hevur stórfelagið í Onglandi, Chelsea, javnan ikki fleiri enn tveir til tríggjar onglendingar á liðnum.
Útlendingar, sum koma hendanvegin skulu hava arbeiðs- og uppihaldsloyvi, alt eftir, hvaðani teir koma.
Fer at skapa frið í føroyskum fótbólti
Niclas Davidsen sigur, at um uppskotið verður samtykt, so fer hetta at føra við sær, at tað fer at skapa frið í føroyskum fótbólti. Í dag ganga øll feløgini og leita eftir spælarum í Føroyum, og hetta órógvar feløgini nógv. Niclas sigur at enda, at ein sjálvandi eisini má hugsa um sínar egnu leikarar. Eru teir góðir nokk, so er eingin grund til at fara uttanlands.
