Við hesum lógaruppskotinum verða málsøkini tvingsil í psykiatri og rúsandi evni formliga yvirtikin og føroyskir myndugleikar fáa lóggávuvald og útinnandi vald á nevndu málsøkjum.
Í dag verða málsøkini umsitin og í høvuðsheitum fíggjað av føroyskum myndugleikum. Tí kemur yvirtøkan ikki at hava við sær munandi fíggjarligar avleiðingar.
Endamálið er at tryggja, at Føroyar sjálvar hava fulla ábyrgd av lóggávu og fyrisiting á hesum virknu og viðkvæmu økjum, samstundis sum verandi reglur halda áfram at galda, inntil tær verða broyttar av føroyskum myndugleikum.Lógaruppskotið er partur av einari størri yvirtøku av málsøkjum og er ætlað at koma í gildi 1. januar 2027.
– Tað er av stórum týdningi, at vit í Føroyum sjálvi hava ábyrgdina av lógarøkjunum tvingsil í psykiatri og rúsandi evnum. Tá lógarøki verða umsitin her í Føroyum, ger tað skipanirnar smidligari og avgerðirnar skjótari. Tað styrkir tænasturnar og gevur okkum betri møguleikar at laga reglurnar til føroysk viðurskifti, sigur Súsanna Bertholdsen, landsstýriskvinna.
