Í januar í ár handtók og skuldsetti Føroya Politi ein mann í fimmtiárunum fyri at fremja kynslig brotsverk á internetinum. Í sambandi við handtøkuna bleiv húsarannsókn eisini framd og hald bleiv lagt á ymsar teldulutir. Tann skuldsetti hevur verið varðhaldsfongslaður síðan handtøkuna, og kanningararbeiðið er nú liðugt.
Tað upplýsti løgreglan í gjár.
Málið hevur verið fyri í rættinum í dag, og maðurin varð á middegi dømdur í fongsul í 2 ár og 6 mánaðir.
Ákæruvaldið hevði annars kravt ein dóm upp á 4 til 4,5 ár, men av tí at nøkur av brotunum vórðu framd, áðrenn revsilógin á økjunum varð herd, fekk maðurin ein linari dóm. Tað upplýsti Katrin Thorsvig Hansen, ákæri, fyri Kringvarpinum.
Maðurin, sum nú er dømdur, er millum annað skuldsettur fyri at hava deilt yvir 50 myndir og filmar við barnapornografiskum innihaldi og at hava í varðveitslu yvir 30.000 myndir og filmar við barnapornografiskum innihaldi.
Haraftrat er hann skuldsettur fyri, á sosiala miðlinum Twitter nú nevnt »X«, í fýra umførum at hava viðvirkað til roynd at neyðtaka børn undir 12 ár við at hava eggjað aðrar brúkarar uttan fyri Føroyar at neyðtaka børn og at hava vegleitt hesar persónar um, hvørjar kynsligar gerðir teir skuldu gera móti børnunum.
