Á býráðsfundi í Havn í gjár varð upplýst, at Elsa Berg nú aftur tekur sæti í býráðnum. Tað ger hon, eftir at hon síðani í august í fjør hevur verið í farloyvi. Og tað hevur hon verið, tí hon hevur verið í Íslandi í lestrarørindum.
Í fundarfrágreiðingini stendur, at »av tí at býráðslimurin sigur frá sær fasta bústað sín í kommununi heitir hon á kommunustýrið um at góðkenna, at hon fer úr býráðnum, inntil hon aftur tekur fastan bústað í kommununi«.
Í lógini um val til føroyskar kommunur § 26, stk. 4, er ásett, at: »Um limur fyribils sigur frá sær fasta bústað sín í kommununi, kann verða samtykt, at hann bert fer úr bygda(r)ráðnum/býráðnum, inntil hann aftur tekur fastan bústað í kommununi«.
Tí stendur soleiðis í gerðabókin fyri fundin, tá hon fekk farloyvi:
– Vísandi til nevndu áseting verður býráðið við hesum biðið um at taka støðu til fyrispurningin hjá Elsu Berg og góðkenna, at býráðslimurin fer úr býráðnum, meðan hon er burturstødd, og at talan er um fyribils fráflyting úr kommununi, sum merkir, at býráðslimurin aftur tekur sæti í býráðnum, tá hon aftur hevur fastan bústað í kommununi.
Tí tók næsta fólk á listanum, Turið Horn, við sum býráðslimur og hevur verið tað seinasta árið.
Men á býráðsfundinum í gjár tók Elsa Berg aftur við starvinum sum býráðslimur fyri Tjóðveldi.
Hesi ovastu trý vórðu vald fyri Tjóðveldi í Tórshavnar býráð á seinasta býráðsvali:
1 Elsa Berg 520
2 Jákup Dam 376
3 Gunvør Balle 249
---
4 Turið Horn 245
5 Jón Kragesteen 212
6 Gunnar Djurhuus 210
7 Anja Hartmann Wardum 126
8 Ronnie Thomassen 120
9 Jóannes Guttesen 109
10 John Kruse Dalsgarð 97
11 Brandur í Dali 92
12 Jóhan Carl Dam 87
13 Bergdís Ester Gisladóttir 85
14 Katrin Einarsson Jacobæus 63
15 Snorri Patursson 51