Um 04.30 í nátt fekk løgreglan eina fráboðan um eitt heldur ógvusligt ferðsluóhapp á vegnum millum Kaldbak og Kaldbaksbotn.
- Bilurin, sum fór niðan av vegnum, er farin runt, og hann er í knúsi, visti vaktleiðarin á løgreglustøðini at siga í morgun.
Lagt verður aftrat, at við sær í ferðini tók bilurin eisini fleiri metrar av bilverju í niðara borði, og reiv hegn við sær í ovara borði.
- Bilførarin, sum var einsamallur, hevði sjálvur sloppið sær úr bilinum, og varð eftir óhappið fluttur á Landssjúkrahúsið.
Vaktleiðarin segði seg ikki duga at siga, hvussu bilførarin hevur tað, men sum skilst, er viðkomandi innlagdur.
Bilurin, sum eisini fór runt í ferðini, er í knúsi.
- Í løtuni kunnu vit ikki siga, um rúsdrekka var uppi í málinum, men blóðroynd er tikin, sum er vanligt í slíkum føri, sigur vaktleiðarin.