Bæði føroyingaliðini vóru í kvøld í leiki í triðseinasta umfarinum í grundspælinum í bestu svensku hondbóltsdeildini.
Óli Mittún og liðfelagarnir í Sävehof hava fyri langari tíð síðani tryggjað sær fyrsta plássinum í grundspælinum, og tí eru ongar alarmklokkur aftaná greiða 26-33 tapinum fyri Hammarby á útivølli. Í steðginum var Hammarby á odda 16-12.
Óli skoraði fimm mál og var næstbesti málskjúttin hjá Sävehof.
Sävehof er fremst við 39 stigum. Hammarby er nummar tvey við 33 stigum, men kann í mesta lagi røkka 37 stigum.
Komandi leygardag klokkan 15 hevur Sävehof heimadyst móti Kristianstad í Partille. Sävehof tapti meistaraskapsfinalurnar 2-3 fyri Kristianstad farna kappingarár, og tí er okkurt at hevna hjá Óla og liðfeløgunum.
Rói Ellefsen á Skipagøtu, Pætur Mikkjalsson og liðfelagarnir í Hallby taptu tepurt 36-38 fyri Ystad á útivølli. Í steðginum var Ystad á odda 19-17.
Rói skoraði fýra mál í dystinum.
Hallby er nummar 11 og fjórðaftast við 17 stigum nú bert tvey umfør eru eftir at leika.
Komandi mánakvøld klokkan 18 tekur Hallby móti Hammarby á heimavølli.
Grundspælið í bestu svensku hondbóltsdeildini endar skírisdag 28. mars.
