Tað hevur gingið væl hjá B71 á heimavølli higartil í ár og harvið síðani tunnilin undan jólum læt upp. Úrtøkan í fýra teimum fyrstu heimadystunum var tríggir sigrar og málleysur javnleikur ímóti TB.
Í kvøld vendi tað heilt øðrvísi, tá ið teir næstbestu hjá Víkingi vóru á vitjan. Undan dystinum í kvøld var B71 á øðrum plássi við 16 stigum fyri sjey dystir, meðan Víkingur var á áttanda plássi við sjey stigum.
Men í kvøld var eingin ivi um, at tað var Víkingur, sum var omaná. Víkingur vann 3-0, og hagtølini siga, at Víkingur vann átta hornaspørk, og at B71 vann trý hornaspørk. Víkingur hevði fimm royndir ímóti heimamálinum, meðan B71 hevði tvær royndir ímóti málinum hjá Víkingi.
Í tíðini, sum dómarin legði aftrat fyrra hálvleiki, legði Víkingur seg á odda 1-0. Málskjútti var Óla Kristian Skála Jacobsen, sum av brotsteigarmarkinum og við frísparki sendi bóltin í málið aftanfyri Klæmint Olsen. Hetta var aðru ferð í ár, Óla Kristian var millum málskjúttarnar.
Í 65. minutti varð B71 undirmannað, tí Eduardo Coimbra sá gula kortið fyri aðru ferð. Og tveir minuttir seinni sendi Áki Magnussen við høvdinum bóltin í málið, og so var 2-0 til Víking. 19 ára gamli Áki Magnussen hevur seinastu árini verið illa skaðadarvaður. Nú er hann komin fyri seg, og í kvøld skoraði hann fyrsta málið síðani 27. august í 2022, tá ið Víkingur í 1. deild vann 2-1 á heimavølli ímóti B71.
Í 94. minutti var tað Rani Hansen, sum staðfesti 3-0 sigurin. Tað var eftir mistak í B71 verjuni. Hetta var fimta málið hjá Rana, sum er toppskjútti hjá Víkingi í 1. deild.
8 umfar
KÍ – NSÍ 0-0
B71 – Víkingur 0-3 (0-1)
0-1: Óla Kristian Skála Jacobsen 45.+1
0-2: Áki Magnussen 67
0-3: Rani Hansen 94.
Í morgin
FC Hoyvík – AB: Høgni Madsen kl. 16.00
B36 – TB: Áki Leitisstein Hansen kl. 13.30
FC Suðuroy – HB: Leivur Zachariassen kl. 13.30
Støðan
B36 | 7 | 5 | 2 | 0 | 16 | 5 | 17 |
B71 | 8 | 5 | 1 | 2 | 12 | 9 | 16 |
NSÍ | 7 | 3 | 3 | 1 | 11 | 10 | 12 |
FC Suðuroy | 6 | 3 | 2 | 1 | 12 | 6 | 11 |
AB | 7 | 3 | 2 | 2 | 11 | 6 | 11 |
Víkingur | 8 | 3 | 1 | 4 | 16 | 13 | 10 |
KÍ | 8 | 3 | 1 | 4 | 9 | 12 | 10 |
TB | 7 | 2 | 3 | 2 | 10 | 8 | 9 |
HB | 7 | 0 | 2 | 5 | 7 | 19 | 2 |
FC Hoyvík | 7 | 0 | 1 | 6 | 2 | 18 | 1 |