info
Ongi úrslit

Fleiri akfør enn fólk í Fugloy

Í Fugloy eru 58 akfør skrásett, hóast bara 48 fólk búgva í oynni. Tað svarar til 1,21 akfar fyri hvønn íbúgva – nógv tað hægsta lutfallið í Føroyum.

Eirikur Lindenskov
4. september 2026 kl. 18:15

Føroyingar hava nógv akfør, men tey eru ikki javnt býtt kring landið.

Ein uppgerð hjá Akstovuni vísir, at 43.504 akfør vóru skrásett í Føroyum 1. september 2026. Av teimum vóru 28.562 persónbilar.

Tá ið akførstølini verða samanborin við nýggjasta hóskandi fólkatalið hjá Hagstovuni, er Fugloy í einum flokki fyri seg.

Tann 1. juli 2026 búðu 48 fólk í Fugloy – 18 í Hattarvík og 30 á Kirkju. Men tveir mánaðir seinni vóru 58 akfør skrásett í oynni.

Tað svarar til 1,21 akfar fyri hvønn íbúgva. Fugloy er sostatt einasta oyggin í uppgerðini, har talið av skrásettum akførum er størri enn fólkatalið.

Ikki 58 vanligir bilar

Øll tey 58 akførini eru kortini ikki vanligir persónbilar.

Akstovan skrásetir fleiri sløg av akførum. Í Fugloy eru 32 persónbilar. Harumframt eru millum annað tíggju viðfestivognar, fimm ellisakfør, fýra prutl og fýra vøruvognar skrásett.

Hyggja vit bara at persónbilunum, hevur Fugloy 0,67 persónbilar fyri hvønn íbúgva. Tað er hægri enn landsmiðaltalið, sum er 0,51.

Vágar næsthægst

Vágar liggja næsthægst við 0,90 akførum fyri hvønn íbúgva. Har eru 3.104 akfør og 3.447 íbúgvar.

Síðani koma Viðoy við 0,81 akfari fyri hvønn íbúgva og Eysturoy og Suðuroy við 0,79.

Í Føroyum sum heild eru 0,78 akfør fyri hvønn íbúgva. Streymoy liggur eisini á 0,78, meðan Sandoy hevur 0,77 og Borðoy 0,72.

Myndin er ikki tøk

Færri akfør á útoyggjunum

Í hinum endanum eru Stóra Dímun, Mykines og Nólsoy.

Stóra Dímun hevur eitt skrásett akfar til fimm íbúgvar. Tað svarar til 0,20 akfør fyri hvønn íbúgva. Mykines hevur 0,33 og Nólsoy 0,48.

Tølini vísa sostatt ikki eina einfalda mynd, har smáar oyggjar altíð hava nógv akfør í mun til fólkatalið. Munurin millum útoyggjarnar er stórur.

Myndin er ikki tøk

Smá tøl kunnu flyta nógv

Tølini fyri tær smáu oyggjarnar skulu tó lesast við fyrivarni.

Tá ið fólkatalið er lágt, kann eitt einstakt akfar flyta lutfallið nógv. Hetta sæst serliga í Stóru Dímun, Mykinesi, Hesti og Fugloy.

Uppgerðin sigur heldur ikki, um øll akførini eru í oynni dagliga. Hon vísir, á hvørjari oyggj akførini eru skrásett.

Tað kann tí vera, at summi akfør eru skrásett í Fugloy, hóast tey ikki altíð standa ella verða nýtt har.

Myndin er ikki tøk

Uppgerðirnar eru frá ymiskum døgum

Akførstølini hjá Akstovuni eru galdandi 1. september 2026. Fólkatølini hjá Hagstovuni eru uppgjørd 1. juli 2026 og vóru nýggjasta tøka bygdarbýtið, tá ið samanberingin varð gjørd.

Orsøkin til munin er, at fólkatølini verða almannakunngjørd við seinking. Hagstovan bíðar eftir seinni skrásetingum og fráboðanum, serliga um flytingar, so uppgerðin verður so røtt sum gjørligt.

Lutføllini eru tí roknað við akførstalinum 1. september býttum við fólkatalinum 1. juli.

Mest lisið hesa vikuna

Nú kanst tú síggja lønina hjá grannanum ella stjóranum

13. november kl. 22:59

Landsstýrið black­list­ar 16 bygdi­r og bý­ir í Føroyum

21 tímar síðan

Eldur í á skipasmiðjuni á Skála

13 tímar síðan

Ókent ræðsluevni: Byrjaði at eta seg sjálvan

17 tímar síðan

Nøkur orð um skyldmannin Allan Enghamar

15. november kl. 17:35

Fyrrverandi NSÍ venjari er deyður

14. november kl. 17:37

Fleiri tíðindi

Tíðindi

Stórur skaði av eldinum á Skála

19 minuttir síðan
Tíðindi

Russland ætlaði at fremja álop á Pólland úr Kaliningrad

39 minuttir síðan
Hondbóltur

VIDEO: Soleiðis tapti Füchse Berlin fyri Aalborg

1 tími síðan
Tíðindi

Tvey vaksin og eitt barn funnin deyð í Danmark

3 tímar síðan
Tíðindi

Krim-brúgvin er aftur álopin

4 tímar síðan
Hondbóltur

Champions League: GOG-Magdeburg beinleiðis á TV3

7 tímar síðan
Tíðindi

Magnus verður venjari

10 tímar síðan
Hondbóltur

SMS: Sigrar til Neistan, VÍF og Stjørnuna

10 tímar síðan
Fótbóltur

KÍ hevur sett styrkisvenjara og fysioterapeut

10 tímar síðan
Tíðindi

Nýggjur felags­bygn­ing­ur hjá Setri­num skal standa lið­ug­ur í 2031

10 tímar síðan
Tíðindi

FM í skúlatalvi – dagur 2

11 tímar síðan
Hondbóltur

Jana og Marita vunnu - Maria og Rakul taptu

11 tímar síðan