Um val var í dag, so hevði samgongan millum Sambandsflokkin, Fólkaflokkin og Miðflokkin fallið. Hon hevði bara fingið 15 tingfólk. Stóri taparin er Sambandsflokkurin.

Veljarakanning, sum spyr.fo gjørdi fríggjadagin, gevur Sambandsflokkinum eina afturgongd upp á 7 prosentstig, sum merkir, at flokkurin hevði mist tveir tingsessir og bara fingið fimm tingfólk.

Fólkaflokkurin hevur eisini afturgongd og missir smá tvey prosentstig, men varðveitir síni 8 tingfólk. Miðflokkurin gongur 1,4 prosentstig fram, sum eisini gevur honum sama tingfólkatal.

Stóri vinnarin er Javnaðarflokkurin, sum gongur 8,3 prosentstig fram og fær 30,5 prosent og 10 tingfólk, trý fleiri enn á valinum í 2019. Av andstøðuflokkunum gongur eisini Framsókn fram og fær 2,4 prosent fleiri atkvøður, men er akkurát ov stuttur at fáa triða tingsessin, sum hann so hevði tikið frá Sambandsflokkinum.

Tjóðveldi stendur í stað, og Sjálvstýri hevði ikki komið inn um tinggáttina.