Línuskipið Ågot í Klaksvík hevur loyst og hevur sett kós yvir á Flemish Kap, har teir fara at fiska av felagskvotu, sum føroysk línuskip hava har yviri. Hóast teir loystu í endanum av jólunum, hava teir jólapakkar við, sum Føroyska Sjómansmissiónin hevur borið teimum umborð. Sum skilst, fær manningin pakkarnar nýggjársaftan. Tað er langur vegur úr Føroyum og yvir á Flemish Kap og alt eftir veðri, kann roknast við, at ferðin yvir um hav fer at taka eina góða viku ella so.   Ågot hevur annars ligið, síðan teir síðst í november komu heim aftur úr Grønlandi, har teir hava tikið ímóti fiski frá grønlendskum útróðrarmonnum. Skipið hevur eisini verið á sleipistøð, har ymiskt viðlíkahaldsarbeiði er gjørt. Sjómanstrúboðarin, Torleif Johannesen, sum situr aftastur miðskeiðis á viðheftu mynd, vitjaði umborð og gav manningini jólapakkar, sum sjómanskvinnuringar hava syrgt fyri. Skiparin á Ågot, Hjaltur Poulsen, segði seg vóna, at teir fyrst kunnu fiska ein túr, landa í St John í Ný Foundlandi - og siðan kunnu fiska nøkur tons aftrat, áðrenn felagskvotan verður uppi. - Hvussu fiskiskapurin verður á Flemish Kap í ár, er ógjørligt at siga nakað um. Í ár var gott, tó at hin fyrsti stokkurin hjá okkum - umleið 1000 húkar - einans gav tveir fiskar. Hjaltur Poulsen sigur, at eftir fyrstu vánaligu løtuna á Flemish Kap í januar í ár, bragdaði veruliga, og tá saman um kom, fiskaðu teir 300 tons í fimm vikur. 16 mans eru við Ågot, sum nú er ávegis yvir um hav og onnur skip, sum um dagarnar - antin eru farin ella fara somu leið - eru línuskipini, Kambur, Klakkur, Eivind og Stapin.