Fyri júst 10 tíggju árum síðani borðreiddi Sosialurin við Tórbjørn Jacobsen, mentamálaráðharra, á forsíðini, har hann skírdi Anfinn Kallsberg, løgmann at vera ein danskan leigusvein.
Illsinnislepsið hjá Tórbjørn Jacobsen kom, eftir at løgmaður hevði biðið hann tikið aftur rundskriv, har hann hevði givið skúlunum frí 1. mai í staðin fyri grundlógardagin.
Men tað var eftirspælið av orrustuni, sum vit á redaktiónini minnast best. Tá vit bóðu løgmann um viðmerking, fór alt maskinaríið í gongd. Tórbjørn Jacobsen varð sendur út á redaktiónina hjá okkum á Argjum, har hann læs greinina - og váttaði, at hann hevði sagt alt tað, hann varð endurgivin fyri at siga.
Men tað hóvaði ikki leiðsluni í flokki hansara. Høgni Hoydal ringdi fleiri ferðir til fleiri okkara og júkaði okkum um at steðga útgávuni av blaðnum. Men tað bar ikki til – og blaðið var farið til prentingar. Endin var so tann, at eitt tíðindaskriv kom frá Tórbjørn Jacobsen – sent umvegis telefaxið hjá Høgna Hoydal, har hann avsannaði alt, hann varð endurgivin fyri at siga. Alt var íspinn hjá Sosialinum, segði hann:
»Undirritaði hevur ongantíð brúkt hetta orðið um løgmann og kundi eiheldur nakrantíð funnið upp á tað. Harumframt eru í greinini ein røð av øðrum viðurskiftum og ákærum mótvegis løgmanni, sum eg eri siteraður fyri. Undirritaði vil hervið treytaleyst avsanna øll úttalilsir í greinini, sum snúgva seg um løgmann.«
Tíbetur hevði blaðmaðurin bandað samrøðuna. Sjónvarpið spurdi kvøldið eftir Tórbjørn, um tað veruliga var ein lygisøga, sum Sosialinum borðreiddi við. Tað váttaði mentamálaráðharrin. Síðani spældi sjónvarpið bandupptøkuna – og Tórbjørn stóð sum hevði hann bitið í lort – avdúkaður fyri at lúgva alment fyri opnum skíggja.
Seinni hevur Tórbjørn Jacobsen sagt, at tíðindaskrivið, hann sendi, varð skrivað upp á nakkan á honum fyri at bjarga samgonguni.
