Tað skal ætlandi gerast 1. januar í 2012, at vit sleppa undan at gjalda til Heilsutrygd, tí gjaldið verður flutt yvir skattin.
Tað er í hesum sambandi, at Jørgen Niclasen ætlar at lata okkum skattalættan, tí skatturin skal ikki hækka, sigur hann, tó at hetta skal gerast í stigum.
Hyggjuráðini hjá Jørgeni Niclasen til tess at megna hendan skattalættan eru at spara innan fyrisiting, umsiting og eftirlit.
– Alt hetta kostar jú 800 milliónir, sigur Jørgen, so hvat er tað at spara ein áttandapart?
Tí fólkafloksformaðurin heldur, at vit hava alt ov nógvar almennar stovnar, tí skulu vit hava samanleggingar – ráð skulu leggjast saman, og stovnar skulu leggjast saman fyri at fáa eina rationellari fyrisiting.
– Og tað ber til, sigur Jørgen, hóast hann ikki hevur roknað upp á tað og ikki vil siga, hvørjir stovnar, ið skulu leggjast saman.
Og hetta sigur maðurin, sum gongur fyri dupulta løn í tinginum – hann fær bæði løgtingsløn og landsstýrisløn. Góði Jørgen, hvussu kanst tú tosa um almennar sparingar, tá tú gongur á odda sum eitt alment oyðsl?
