Roknast kann við hálku nógva staðni í Føroyum í kvøld. Sambært Landsverki er hált bæði í Vágunum, Eysturoynni, Streymoynni og í Norðoyggjum.
Hálkan kemur oftani óvart á okkum, og tað eru alt ov mong, ið taka kjansir í koyring um veturin. Hetta eitt nú við at bíða ov leingi at fáa vetrar- ella píkadekkini á, skunda sær ov nógv um morgnarnar og yvirhøvur undirmeta vandan í hálkuni.
Landsverk hevur nøkur góð ráð til allar bilførarar í vetrarferðsluni. Ráðini eru hesi:
- Nýt røttu dekkini
- Far heimanífrá í góðari tíð
- Kanna koyrilíkindini á landsverk.fo
- Minst til fartelefonina og syrg fyri, at hon er lødd
- Hav altíð eitt teppi við í bilinum. Verður bilurin fastur í kavanum, er gott at halda seg heitan, til hjálpin er á staðnum
- Skava kava og ís av bilrútum, speglum og lyktum, áðrenn farið verður avstað
- Koyr altíð varliga og eftir umstøðunum
- Halt frástøðu til bilar frammanfyri. Bremsulongdin er longri í hálku
- Bremsa ikki knappliga
- Um neyðugt er at steðga, so tendra ávaringarljósini fyri at ávara onnur um, at bilurin stendur stillur
- Minst til at vísa av í góðari tíð, so bilurin aftan fyri kann taka hædd fyri hesum
- Ansa eftir ikki at tarna teimum, sum salta og grava kava
- Halt passandi frástøðu til gravimaskinur. Kavaskíggj kunnu taka sýnið eina løtu.
