Við 10. plássinum í U20 EM-endaspælinum í Portugal í fjør tryggjaðu Føroyar sær rætt til at kappast í U21 HM-endaspælinum í Grikkalandi og Týsklandi í summar. U21 HM-endaspælið verður avgreitt millum 20. juni og 2. juli.
Talan verður um fimm leikvøllir til HM-endaspælið. Korydallos og Sofia Befon í grikska høvuðsstaðnum, Athen. Max-Schmeling Arena í týska høvuðsstaðnum, Berlin. GETEC Arena í Magdeburg, og Swiss Life Hall í Hannover.
Lutakastið til innleiðandi bólkarnar verður 17. januar.
Í HSF kunnu tey staðfesta, at Føroyar vera í styrkisbólki 2, og gevur tað vónir um, at vit kunnu fáa nøkur mótstøðulið sum vit kunnu knógva á einum góðum degi.
