Tað verða rættiliga dýr atgongumerki til tiltak við hjá Barack Obama, tá hesin kemur til Noregs í mai.
Fyrrverandi amerikanski forsetin fer á pallin í Oslo Spektrum hin 12. mai, og Aftenposten veit at siga, at dýrastu atgongumerkini longu eru seld.
Klokkan 10 í morgun, lokala tíð, vórðu atgongumerkini løgd út á Ticketmaster, og eftir ongari løtu vóru dýrastu atgongumerkini longu seld.
Tiltakið i Oslo kallast "A Conversation with president Barack Obama".
- Fyri tey atgongumerki, sum eru nærmast pallinum, máttu fólk rinda heilar 5130 norskar krónur fyri hvørt atgongumerki.
Aftenposten veit at siga, at hesi dýrastu atgongumerkini vóru seld longu klokkan 10.01 - ella eftir bert einum minutti.
Hetta er ikki fyrstu ferð, at Barack Obama vitjar í Noregi, tí her var hann eisini, tá hann fekk friðarheiðursløn Nobels í 2009.
