AaB-spælararnir og viðhaldsfólk teirra kunnu lyfta høvdið høgt. Í samfullar 120 minuttir stríddust teir mannliga, og síðst í vanligu leiktíðini høvdu teir liðið úr Manchester á knøunum. Tað rakk til heiður og æru, men tað rakk ikki til fjórðingsfinalurnar í UEFA Cup-kappingini.
Fyri aðru ferð í hesi kappingini slapp Manchester City úr Danmark við skinninum á nøsini. Áðrenn bólkaspælið vunnu teir á FC Midtjylland eftir brotssparkskapping, og nú hava teir vunnið á AaB, somuleiðis eftir brotssparkskapping.
Tað var ikki so nógvur dramatikkur í byrjanini av dystinum. Bæði lið hóttu hendinga ferð málið hjá mótstøðuliðnum, og hevði Stephen Ireland ein góðan møguleika at leggja City á odda.
AaB longur fram
Vitandi, at tvey mál skuldu til fyri bara at fáa umdyst, fór AaB longur fram á vøllin í seinna hálvleiki. Caca hevði ein stóran møguleika í byrjanini av seinna hálvleiki, sum fór beint við síðuna av, og Andreas Johansson var feldur í brotsteiginum, men franski dómarin metti ikki, at talan var um brotsspark.
AaB helt fram við at trýsta fyri at fáa hol á, men tá átta minuttir vóru eftir av vanligu leiktíðini, kundi Robinho havt avgjørt alt fyri City, men skotið rakti tvørtræið.
Tá fimm minuttir vóru eftir av vanligu leiktíðini, broyttist alt. Caca spældi bóltin stutt til Luton Shelton, sum setti bóltin í netið við handaru stong. Nú byrjaði teir í AaB at tevja møguleikan, og teir trýstu enn meira. Og tá 90 minuttir vóru farnir fingu brotsspark. Michael Jacobsen skoraði trygt, og nú var støðan 2-0 til AaB.
City kaldari
Tá Manchester City hevði vunnið 2-0 í fyrra dystinum, var neyðugt við longdari leiktíð. AaB helt fram við at trýsta, men mál kom einki, og neyðugt var tí við brotssparkskapping.
Í brotssparkskappingi vóru marginalarnir við Manchester City. Hóast AaB-málverjin fór rætta vegin tríggjar ferðir, so tók hann einki av spørkunum.
Verri gekst hjá Luton Shelton og Thomas Augustinussen, sum skuldu finta roynda liðfelagan hjá Gunnari Nielsen, Shay Given. Given tók brotsspørkini hjá teimum, og endin var, at City vann brotssparkskappingina 4-3.
Hug at gráta
AaB-spælararnir fylgdu taktikkinum, sum var lagdur, og var tað ein ógvuliga vónsvikin høvuðsvenjari, sum tosaði danskar fjølmiðlar eftir dystin.
– Tað er líka við, at eg fari at gráta, segði Magnus Pehrsson við donsku fjølmiðlafólkini. Hann rósti sínum spælarum fyri at leggja eitt maksimalt trýst á Manchester City síðstu 20 minuttirnar av dystinum, tá AaB hevði City á knøunum.
Venjarin hjá Manchester City, sum í UEFA Cup-kappingini hevur møtt trimum donskum liðum í ár, hevði bara rós til AaB: – Teir eru komnir langt í hesi kappingini í ár og hava lært eina rúgvu. Tað fingu vit at kenna í kvøld, segði Mark Hughes.
