Liðið hjá Sveini Olafssyni og Halli Arasyni, Afturelding spældi í dag á heimavølli í Mosfellsbær fyrstu fjórðingsfinaluna í endaspælinum í bestu íslendsku hondbóltsdeildini. Mótstøðuliðið var ÍBV.
Tað eydnaðist Afturelding at vinna dystin 32-30. Í steðginum var útiliðið frammanfyri við einum máli, 14-13.
Hallur Arason (myndin) var við fimm málum triðbesti málskjúttin hjá Afturelding.
Komandi týskvøld spæla ÍBV og Afturelding aðru fjórðingsfinaluna úti í Heimaey. Eydnast liðnum hjá Halli og Sveini at vinna tann dystin verður Afturelding millum tey fýra liðini, ið skal spæla hálvfinalur.
Í kvøld klokkan 20 verður føroyingauppgerð í høllini á Hlíðarenda í Reykjavík. Tá taka Bjarni í Selvindi, Allan Norðberg og liðfelagarnir í Vali móti Jóhannes Bjørgvin og hansara liðfeløgum í Stjörnuni. Í hesum førinum er eisini talan um fyrstu fjórðingsfinaluna, har spælt verður best av trimum dystum.
