Fyrrverandi danski forsætisráðharrin, Anker Jørgensen, er deyður 93 ára gamal.
Anker Jørgensen var forsætisráðharri frá 1972-73 og frá 1975-82 og var formaður í danska Javnaðarflokkinum frá 1973 til 1987.
Hann var giftur við Ingrid Kvist Pedersen, sum doyði í 1997. Tey áttu børnini Peter, Lars, Mette og Kirsten.
Anker Jørgensen sovnaði stillisliga í deyðin við sínum nærmastu kring seg.
Hann varð føddur 13. juli í 1922 í einum vesaligum kolonihavahúsi á Irlandsvej á Amager – sonur kuskin Johannes Albert og vaskikonuna Karen Marie.
Bæði foreldrini doyðu tíðiliga av tuberklum, og sum fimm ára gamal var Anker Jørgensen foreldraleysur. Hann flutti tá til fastur sína at búgva.
Politiska yrkisleiðin hjá Anker Jørgensen byrjaði, tá hann sum 28 ára gamal varð valdur til næstformann í Lager- og Pakhusarbejdernes Forbund. Seinni gjørdist hann formaður í Dansk Arbejdsmands- og Specialarbejderforbund, sum nú eitur 3F.
Í 1964 varð hann valdur í fólkatingið, og hann tók við sum forsætisráðharri, tá Jens Otto Krag brádliga legði frá sær sum forsætisráðharri dagin eftir fólkaatkvøðuna um EF limaskapin, 3. oktober í 1972.
