Vestari armur av Skálafjørðinum hevur ongan tannlækna, og Sjóar kommuna roynir av øllum alvi at finna eina loysn, tí børnini mugu sleppa til tannlækna.
Á tannlæknastovnuni á Skála arbeiðir ein tannrøktari, men tannrøktarin kann ikki loysa allar upgávurnar. Er tað neyðugt fyri børn at sleppa til tannlækna, verður í hvørjum einstøkum føri gjørd avtala við Oddmar Færø, sum arbeiðir sum tannlækni í Hvalvík.
- Nú royna vit at fáa eina fasta avtalu við Oddmar Færø, tí hóast vit hava søkt, hevur ikki eydnast okkum at fáa okkara egna tannlækna, sigur Arthur Johansen, borgarstjóri í Sjóar kommunu.
Vónir eru tó um at fáa ein tannlækna, tí ein strandingur er nýliga útbúgvin sum tannlækni, men viðkomandi kann ikki arbeiða sjálvstøðugt beinanvegin.
