Fyri at kanna hetta nærri bóðu vit Føroya Rætt um innlit búroknskapirnar hjá øllum feløgunum, sum løgmaður hevur varðað av.
Allir partafelagsroknskapir eru almennir, men tá feløgini – sum í hesum førum – eru farin á heysin, so fara tey gjøgnum Skiftirættin og verða uppgjørd í rættinum og ein búroknskapur gjørdur. Hesin roknskapur er ikki almennur.
Men tey sum eru kravánarar – ella tey, sum felagið skyldar pengar, kunnu fáa búroknskapin.
Av tí at Sosialurin átti um 110.000 krónur til góðar hjá einum av feløgunum, sum løgmaður var nevndarformaður í, fekk blaðið partsinnlit í hendan roknskapin.
Sum sagt er talan í hesum felagnum um tap upp á 1,5 milliónir krónur. Vit kundu hugsað okkum innlit í roknskapin hjá P/F KRK Holding.
Seinasti roknskapur, sum er frá 2007, vísir eitt hall upp á góðar 10 milliónir krónur, og eginognin er negativ við við góðum fýra milliónum. Skuldin hjá felagnum er 13,5 milliónir krónur.
Vit kundu eisini hugsað okkum innlit í dóttirfelagið P/F Farex, sum í síðsta roknskapinum, sum er fyri 2006, hevur eina samlaða skuld upp á 38 milliónir krónur, har av 27 milliónir eru bankaskuld.
Innlit í búroknskapirnar hjá hesum feløgunum eru serliga áhugaverdir, tí løgmaður sigur, at eingin hevur mist eina krónu upp á hesi feløg.
Okkara avdúking vísir, at løgmaður ikki segði satt um tapið av Sp/f Sisero. Tølini í hinum feløgunum eru himmalrópandi høg í mun til Sisero.
Eisini loyva vit okkum at gita, at búroknskapirnir fyri hesi feløg eru munandi ljótari enn seinastu ársroknskapirnir, tí tá allar ognir skulu realiserast í senn, fella aktivini munandi í virði.
Tí trúgva vit snøgt sagt ikki uppá, at løgmaður og felagar hansara hava svarað hvørjum sítt, og at eingin hevur mist pengar av teirra virksemi.
