Barnabati skrivar, at í hesum sambandi verður nógv arbeiði lagt í at finna út av, hvat børn og ung í Føroyum halda er eitt gott lív.
Tvær ráðstevnur hava verið í Norðurlandahúsinum, har umboð fyri børn og ung frá øllum stovnum og skúlum í Føroyum hava havt møguleika at luttaka.
Saman hava tey á skapandi verkstovum viðgjørt spurningarnar, Hvat er eitt gott heim?, Hvat er góð frítíð og heilsa? og Hvat er eitt gott stovns- og skúlalív?. Tey hava lýst og sett orð á teirra hugsanir um spurningarnar við tekningum og øðrum skapandi tilgongdum.
Barnabati ynskir at tryggja, at røddin hjá børnum og ungum, sum vaksa upp í fíggjarliga sperdum familjum, eisini verður hoyrd.
Í hesum sambandi søkir Barnabati eftir børnum og ungum í aldrinum 7 til 18 ár, sum vilja vera við til skapandi arbeiðsuppgávur á Barnabata.
Hetta verður mánadagin 28. apríl kl. 9 - 12 og kl. 13 - 16.
Í smáum arbeiðsbólkum við 4 børnum ella ungum verður funnið finna fram til, hvat eyðkennir eitt gott barna- og ungdómslív.
Tey sum ynskja at vera við, ella kenna onkran sum kann hjálpa til í hesum arbeiði kunnu senda Barnabata boð á barnabati@barnabati.fo ella hoyra nærri á tlf. 224160.
