Undir floksfundinum hjá Demokratiska flokkinum hesa vikuna, tá Biden endaliga varð kosin sum forsetavalevni floksins, vórðu savnaðar 70 milliónir dollarar til forsetavalstríðið hjá honum.
Tað upplýsti valsamskipianin hjá honum í gjár. Upphæddin svarar til 442 milliónir krónur í okkara pengum.
Floksfundurin endaði í gjár við, at tann 77 ára gamli Biden góðtók endaligu tilnevningina at stilla upp ímóti republikanaranum Donald Trump, sum roynir at verða afturvaldur sum forseti á valinum 3. november.
Floksfundurin varð vegna koronukreppuna fyri tað mesta hildin á netinum.
Beinleiðis stroymingar frá tiltakinum á talgildum miðlum rukku til 122 milliónir hyggjarar, meðan 85,1 milliónir hyggjarar fylgdu hendingini í sjónvarpi, upplýsir valskrivstovan hjá Biden.
Tær 70 milliónir dollararnnir skulu leggjast afturat teimum 140 milliónum dollarunum, sum vórðu savnaðir í juli. Herferðin hjá Donald Trump savnaði til samabering saman 165 milliónir dollarar í juli.
Trump fer inn í avgerandi partin av valstríðnum við einum lítlum fyrimuni, mált í pengum.
Tilsamans hevur Trump yvir 300 milliónir dollarar at brúka til at sannføra veljararnar um at atkvøða fyri sær, upplýsti valsamskipanin hjá honum fyrr í mánaðinum.
Joe Biden hevur til samanberingar 294 milliónir dollarar til sína herferð.
Republikanski flokkurin byrjar floksfund sín mánadagin. Hann verður eisini hildin í fýra dagar.
/ritzau/Reuters
