Í minsta lagi 17 fólk doyðu í einum skottilburði í skúla í Florida, upplýsir løgreglan. Tann mistonkti er handtikin.
Seinnapartin í gjár kom fjáltur á næmingar í einum skúla í syðra parti av Florida í USA, tá ein maður fór at skjóta ímóti lærarum og næmingum.
Skott Israel, sjeriffur í Broward County, sigur sambært Reuters, at í minsta lagi 17 hava latið lív.
Skottilburðurin var á Marjory Stoneman Douglas High School í býnum Parkland, umleið ein tíma norðan fyri Miami. Vanlukkutilburður fór fram, tá næmingar fingu frí úr skúlanum.
Onkur – allar helst gerningsmaðurin – tendraði brandávaringina, og meðan næmingar streymaðu út úr flokshølunum, fór hann at skjóta í og kring ein ávísan bygning á skúlanum.
Løgreglan heldur, at hon hevur handtikið tann seka. Talan er eftir øllum at døma um Nikolas Cruz, ein fyrrverandi næming á skúlanum, sum sambært Reuters er 19 ára gamal.
Cruz var í sínari tíð burturvístur úr skúlanum av disiplinerum orsøkum, sigur Scott Israel. Sjeriffurin sigur samstundis, at Cruz brúkti í minsta lagi eina rifflu og fleiri magasin til at skjóta eftir ofrum sínum.
Gerningsmaðruin varð handtikin í grannabýnum Coral Springs. Tað var umleið ein tíma eftir skottilburðin á skúlanum.
Skottilburðurin er nummar 18 í ár.
– Hetta er ræðuligt fyri okkum øll, sigur skúlaleiðarin í økinum, Robert Runicie.
Bæði Donald Trump, forseti, og guvernørurin í Florida, Rich Scott, hava fingið boðini um støðuna og fylgja henni neyvt.
Sambært blaðnum Sun Sentiel ganga umleið 3.000 næmingar á skúlanum, sum hevur flokkar frá 9. til 12. flokk.
/ritzau/
