Hesi seinastu árini hevur bygdarstevna um várið verið fastur táttur í virkseminum hjá Bóltfelagnum Royn. Og stevnan í ár verður hetta vikuskiftið við ymsum tiltøkum á skránni.
Bygdarstevnan verður í morgin, Dýra Biðidag og leygardagin.
Stevnan byrjar í morgin klokkan 14 á Skúlastykkinum, táið Niels Nattestad, vanliga nevndur Natte, ættaður úr Hvalba, men búsitandi í Havn, setir stevnuna.
Annars eru nógv ymisk tiltøk á skánni.
Báði í morgin, og leygardagin eru alskyns tiltøk á skránni í Roynhøllini,
Har er m.a. skjóting fiskidammur, tombola, 21 spæl, køkutombola, o.s.fr.
Har fæst eisini popkorn, kaffi og kakur til keyps.
Nógvur fótbóltur er eisini á skránni.
Høvuðsdysturin verður í morgin kl. 18, táið 2. deildarliðini hjá Royn og NSÍ spæla landskappingardyst, sum eisini er steypadystur.
Men annars spæla smádreingirnir hjá Royn og AB steypadyst í morgin, kl. 14.30.
Leygardagin verða tveir dystir. Kl. 16 spæla smápiltarnir hjá Royn og TB b og kl 17 spæla piltaliðini hjá Royn og TB b.
Sum vanligt seinastu árini,verður fer eisini at bera til at sleppa ein túr á hestbaki. Ríðingin verður í morgin kl. 16 og leygardagin kl. 14.30.
Sum nakað nýtt er ætlanin at lata óvitar sleppa ein siglitúr við nýggja seksæringinum Naddoddi av Tvøroyri. hetta verður í morgin kl. 15.30 og leygardagin kl. 14. Men hetta er treytað av, at tað viðrar.
Báðar stevnudagarnar verður eisini útimøti um kvøldið.
Í annaðkvøld kl. 21 hevur Brøðrasamkoman útimøti undir Gamla Skúla og leygarkvøldið kl. 20 hevur Frelsunnarherurin útimøti á sama stað.
Og bæði kvøldini er eisini dansur. Fríggjakvøldið spæla Moon Shot úr Vestmanna og Leygarkvøldið spæla Lagamenn.
