Fyrrverandi kubanski leiðarin Fidel Castro hevur skrivað ævisøgu, og í gjár var hann í einum ráðstevnuhúsi í høvuðsstaðnum Havana og kunnaði fólk um ævisøguna, sum er í tveimum bindum. Sambært kubansku tíðindastovuni Gramma tók framløgan seks tímar.
Ævisøgan, sum er um 1.000 síður, greiðir frá lívi høvundans frá barnaárunum til kollveltingina í 1958 og tíðina aftaá. Á enskum eitur hon "Guerilla of Time".
Fidel Castro legði frá sær í 2008, tí heilsan var farin at bila av álvara, og hann hevur sjáldan víst seg alment síðani.
