Føroyski landsliðsleikarin í danska Silkeborg, Christian Lamhauge Holst, hevur ikki júst havt sítt besta tíðarskeið í felagnum, og fær hann nú eisini eina heilsan fyri hetta. Hann er nevniliga á einum liði av størstu vónbrotunum í Superliguni higartil í ár, sum danska Ekstrablaðið hevur sett.
Hann hevur fingið pláss á vinstra vongi og grundgevingin ljóðar:
- Hetta hevur ikki verið árið hjá Christiani Holst. Føroyski landsliðsleikarin hevur verið í einum stórum falli hvat formi viðvíkur, og uppgávan hjá venjara Viggo Jensen má vera at fáa føroyingin í form aftur í vetrarferiuni, so Silkeborg hevur møguleika fyri at yvirliva í Superliguni, skrivar Ekstrablaðið.
Silkeborg hevur vetrarfrí á næstaftasta plássi, eitt stig aftanfyri Esbjerg og eitt stig frammanfyri Brøndby. Næsti dystur hjá Silkeborg verður 3. mars á heimavølli ímóti AaB. 13 dystir eru eftir at spæla.
Liðið sær soleiðis út:
Jesper Christiansen, OB
Anders Randrup, Brøndby IF
Clarence Goodson, Brøndby IF
Sölvi Ottesen, FCK
Daniel Norouzi, Brøndby IF
Dennis Rommedahl, Brøndby IF
Izunna Uzochukwu, FC Midtjylland
Martin Jørgensen, AGF
Christian Holst, Silkeborg IF
Søren Larsen, AGF
Morten Nordstrand, FCNordsjælland
