Men trupulleikin er, at felagið er undir trotabúsviðgerð í skiftirættinum, tí at felagið ikki hevur altið inn roknskap fyri 2012. Tískil er nevnd og leiðsla koyrd frá, og Føroya Skiftirættur hevur ábyrgdina av felagnum. Kortini hevur Hanus Samró, sum eisin er løgtingsmaður, sent fleiri tíðindaskriv út vegna felagið – og mikudagin boðaði hann frá, at tey 1.350 avsláttarkortini eru komin og fáast á ymsum skúlum.
– Støðan hjá felagnum er óbroytt. Tað er framvegis skiftirætturin, sum hevur ábyrgdina av felagnum, so um eigararnir hava okkurt virksemi, so er tað í øllum førum ikki í smápartafelagnum Ó, sigur Kristin Balle á Skráseting Føroya.
Sambært Hanusi Samró var tað eitt mistak, at roknskapurin ikki var farin inn.
– Hetta er bara teknikkur, og viðurskiftini koma aftur í rættlag í dag ella í morgin, segði hann við in.fo í gjár, sum spurdi hann, um hann hevði fingið loyvi frá Skráseting Føroyar at virka felagsins vegna.
Men tað hevur hann ikki spurt skrásetingina um.
– Eg havi advokat á málinum, sigur hann, og havi handlað í góðari trúgv – tí tað snýr seg bara um at geva lesandi bíligari kaffi.
– Eg eri í ferð við at fáa viðurskiftini í rættlag aftur, og tá fari eg sjálvur at taka mær av felagnum, sigur Hanus Samró.
