Sjúrður Skaale
Síðani eg vegna Javnaðarflokkin vann annan fólkatingssessin í 2011, eru – í góðum samstarvi við onnur – úrslit fingin á rættarøkinum, sum eg eri sera glaður fyri.
Rættarøkið er danskt, og tí eru nýggjar íløgur donsk ábyrgd. Men tær koma ikki av sær sjálvum. At fáa hetta raðfest og pengarnar settar av, hevur kravt áhaldni, treiskni og vilja til álitisfult samstarv við allar viðkomandi partar.
Tí eri eg eisini eitt evarska lítið sindur stoltur av tí, sum er komið burturúr:
Nýggj politistøð er bygd.
Ábøtur eru gjørdar í Mjørkadali – og nú verður nýtt fongsul bygt.
Skjótibreyt til løgregluna er komin.
Viðurskifti hjá langtíðarfangum í Danmark eru bøtt.
Pengar eru játtaðir til nýggjar – og sera dýrar – telduskipanir.
Ákæruvaldið verður styrkt til tess at stytta um bíðitíðina hjá teimum, sum skulu fyri rættin.
Og sum tað seinasta verður virksemið hjá PET (Politiets Efterretningstjeneste) í Føroyum eisini styrkt.
Alt hetta styrkir rættarskipanina og føroyska rættarsamfelagið sum heild.
PET – neyðugt eftirlit
Seinasta ábótin – at styrkja PET – er sera týdningarmikil í hesum sambandi.
PET er partur av løgregluni, men hevur víðari heimildir, tí uppgávan at finna og fyribyrgja ymiskum, sum kann hótta samfelagið. Tað er t.d. PET sum hevur steðgað fleiri islamistiskum álopum í Danmark farnu árini.
Orsøkin til, at PET verður meira til staðar í Føroyum, er eyðsýnd: Norska fregnartænastan hevur fleiri ferðir funnið hernaðarútgerð umborð á russiskum skipum. Hon hevur víst á, at skip hjá Murman Sea Food – uttan sakliga grund – aftur og aftur hava lagt seg tætt upp at NATO-venjingum, tætt at kritiskum infrakervi og tætt at hernaðarøkjum í Norra. Í 2022 kvetti eitt av teirra skipum ein avgeranda kaðal millum Norra og Svalbard.
Øll russisk skip kunnu frá degi til dags gerast partur av russiska hervaldinum, og alt bendir á, at nógv teirra ikki bara røkja sivilar, men eisini hernaðarligar uppgávur. Tí varð eitt skip úr russiska ”skuggaflotanum” bordað av finska herinum á jólum og hald lagt á tað. Tikið uppá feskan gerning fyri sabotasju - avdúkað av finsku fregnartænastuni.
Sæð í hesum ljósi er púra upplagt, at PET eisini má fylgja við í, hvat hesi umboð fyri russiska hervaldið – sum er í ferð við ræðuligasta álopskríggj í Europa í 80 ár – gera í Føroyum.
Móti Putin og hansara blóðdálkaða stýri standa øll Norðurlond saman sum eitt!
Danin er fanin
Men Erling Eidesgaard dugir ikki at síggja hetta.
Í hansara høvdi skulu Føroyar ikki standa saman við Finnlandi, Svøríki, Norra, Danmark og Íslandi.
Nei – DANMARK er okkara fíggindi!
Danmark og Føroyar hava ikki somu áhugamál, sigur hann. Og tá eg fegnist um, at PET betur fer at røkja sínar skyldur í Føroyum so renni eg, sambært Erlingi, ”ørindi fyri fólkatingi og ikki fyri Føroyar”.
Hann letur ongan iva vera um, at PET er okkara fíggindi: ”At fyrigykla sær, at PET tænir Føroyum, er fullkomiliga hol í høvdið”, sigur hann m.a.
Og so svingar hann seg heilt upp í retorikkinum: ”Men at dúva uppá fregnartænastur hjá øðrum londum er so í øllum førum verri enn einki, tí tær eru sjáldan í okkara parti. Í ringasta føri er tað landsskaðiligt!”
Ja! Tað sigur hann faktiskt! Landsskaðiligt!
Also: PET, sum – í samstarvi við aðrar norðurlendskar fregnartænastur – skal verja føroyska samfelagið, er ikki í okkara parti. Nei, tað, tey gera, kann vera landsskaðiligt!
Russland – sum nú hevur knasað seks stórar býir í Ukraina, dripið 100.000 av menniskjum og rikið milliónir frá húsi og heimi – er ikki okkara fíggindi.
Nei, tað er DANMARK vit skulu varða okkum fyri!
Tað er ikki russiska hervaldið, sum er vandin. Tað, sum hóttir Føroyar, er, at nakrir fáir persónar verða settir at hava eftirlit við russiska virkseminum. Vandin er, at vit fáa vitan um tað, sum hetta hervald ger um okkara leiðir...
Orsaka meg – men hetta er ein so álvarsamur tilburður av politiskari paranoia, at mann hevur ikki ordiliga orð fyri tí.
Og mann má spyrja Erling Eidesgaard:
Tá hann nú ikki hevur álit á PET – hvat so við løgregluni? Hon er partur av somu skipan. Hon er eisini donsk ábyrgd. Hóttir hon Føroyar? Skal løgreglan avtakast?
Hvat við Føroya Rætti? Tað er eisini ein danskur myndugleiki. Hóttir hann okkum? Skal hann avtakast?
Fjepparar
Erlingsa paranoia er so sjúkligt, at mann kundi grinið at tí.
Trupulleikin er, at hann stendur ikki einsamallur við hesum ideologiskt grundaða misáliti á alt, sum er danskt.
Hyggur mann undir hansara grein á facebook, so eru fleiri áhugaverdir “tumlar”.
Ein er, sjálvandi, frá fyrrverandi løgmanni, Jóannesi Eidesgaard, sum fleiri ferðir hevur avdúkað, at hann ikki skilir hvussu álvarsamt russiska stórálopið á Europa er. At hann nú sær Danmark sum tann stóra fíggindan, er kortini nýtt.
Dennis Holm (sum, reint økonomiskt, gjørdi verðins ringastu fiskivinnuavtalu við Russland í fjør) er sjálvandi eisini við.
Álvarsamari er, at eisini verandi fiskimálaráðharri, Jóhan Christiansen er millum tey, sum klappa Erlingi á herðarnar. Hvussu góðum hondum eru Føroyar í, tá maðurin, sum skal samráðast við Russland um fáar mánaðir, hevur somu forstýraðu heimsmynd sum Erling Eidesgaard?
Og so er tað okkara ”partapolitiskt neutrala” embætisverk. Hákun Jógvansson Djurhuus er eisini uppi í almenna heppikórinum hjá Erlingi! Hesin maður hevur verið umboð Føroya í Reykjavík, Brússel og Moskva í mong, mong ár. Skattgjaldararnir hava rindað øgiligt fyri hesa umboðan. Hvat gagn teir hava fingið av henni, er kortini ivasamt.
Mann hevur tó higartil kunnað troystað seg við, at hann so ikki hevur gjørt nakran skaða. Men at vita, at vit senda ein mann út í heim at umboða okkum, sum alment stuðlar Erling Eidesgaardsa paranoidu Danin-er-fanin heimsmynd, er eitt sindur órógvandi.
