UMMÆLI:
Kim Simonsen
Bæði Iris og Amanda hava brúk fyri at sleppa burtur at sleikja síni sár. Iris bjóðar síni hús í Suðuronglandi fram á alnetinum, og Amanda svarar hesi lýsing.
Her byrjar hendan modernaða screwball komedian, um ungar kvinnur og teirra ævintýr innan stóri kærleikin vísir seg á pallinum.
Tær vilja ikki síggja nakað til menn, men báðar koma at uppliva nakað heilt annað. Beiggi Iris Graham (Jude Law) bankar á hurðina og er so óendaliga sjarmerandi.
Iris møtir grannandum hjá Amandu, sum er Artur (Eli Wallach). Hann er ein sum var ein kendur leikritahøvundi í Hollywood. Hann tosar og tosar um film og kærleiksfilmar.
Við eina veitslu møtir Amanda so komponistinum Miles.
Diaz
Hin vakra Cameron Diaz (f. 1972) spælir leiklutin sum Amanda. Hon var fotomodel í fimm ár, áðrenn hon í 1994 byrjaði at spæla filmar sum 21 ára gomul. Diaz hevur síðani verið við í filmum sum t. d. There’s Something About Mary (1998), Vanilla Sky (2001), Gangs of New York (2002) og I Dine Sko (2005). Diaz er fleiri ferð vald sum ein av teim 50 vakrastu fólkunum í heiminum. Hetta brúkar leikstjórin Nancy Meyers kanska í so nógv, Diaz gongur altíð og melur í undirklæðum og ger seg lekran í filmunum hon er við í, men Diaz er ein ”babe”, ið selur og Jude Law er ein “hunk” sum fær kvinnurnar at floya inn at síggja filmin. Filmurin er tó ein dukkufretur av einumfilmi, ein sápubløra á jólum.
Feelgood
Her byrjar filmurin so at blaka ymiskar sera eykendar søgur fram, sum mest snúgva seg um, at boy meets girl. Og feelgood jólakærleikskomedian er fødd, ja ella endurskapt enn einaferð.
Hetta er ein sterk manning, sum er við í filminum, so sum Cameron Diaz (sum kaska ikki er ein góður leikari, men mest er eitt pyntiligt innslag), Kate Winslet, Jude Law og hin altíð so óføri Jack Black.
Filmurin líkist øllum »screwball« kærleikskomedium, ið Hollywood hevur framleitt síðani 1920ini. Eru tað ikki Katherine Hepburn ella Spencer Tracy, ella Tom Hanks og Meg Ryan, so eru tað Ashton Kutcher og Amanda Peet, ið skulu renna kring alt hatta við forelskilsi, sama gamla »boy meets girl, girl meet boy - whatever« rutinan, sum í sjálvum sær kann vera áhugaverd, men ikki í hesum filminum.
»The Holiday« er sum at hoyra 20 ára gomlu Avril Lavigne siga frá sínum vantandi lívsroyndum í einum 100% designaðum og útspekuleraðum poppsangi, um tey sum burdu, sum skuldu og áttu at fingið hvørt annað. »The Holiday« líkist eitt sindur ov nógv eini 10.000 øðrum hálvvánaligum filmum um sama evni og kemur ikki hálvan skógv í mun til ”When Harry Met Sally”, ”Sleepless in Seattle” ella ”Casablanca”.
2 stjørnur av 6.
