Undir vitjanini hjá kinesiska forsetanum, Xi Jinping, í Russlandi, hava forsetarnir í báðum londunum skrivað undir eina felags útsøgn.
Sambært tíðindastovuni AFP eru Xi Jinping og Vladimir Putin samdir um, at ein kjarnorkubardagi ongantíð má gerast veruleiki.
- Tað kann ikki gerast nakar vinnari í einum kjarnorkubardaga, og hetta má ongantíð henda.
Hetta siga forsetarnir í útsøgnini, sum báðir sambært tiðindastovuni AFP hava undirskrivað.
Kinesiski forsetin kom til Russlands á vitjan fyrrapartin mánadagin, og sambært ætlanini fer hann avstað aftur mikudagin.
Við sær til Russlands hevði Xi Jinping eitt uppskot í 12 punktum um vápnahvíld og frið í Ukraina, men rættiliga ivasamt er, um uppskotið ber á mál.