Tað vóru tvey lið í ringum lagi, ið fóru av vøllinum aftaná dystin í EM-millumbólki 1 í Köln millum Eysturríki og Ísland.
Ísland vann dystin 26-24. Eysturríkarar harmaðust møguleikanum at leggja trýst á Týskland í kapprenningini at røkka hálvfinaluplássinum saman við fronsku vinnarunum av millumbólki 1. Og íslendingar harmaðust, at teir vunnu ein ov lítlan sigur til at røkka olympiska endaspælinum í París. Ísland hevði tørv á at vinna við fimm málum. So har einki lag á monnum, hvørki eysturríkarum ella íslendingum.
Nú hava íslendingar tørv á, at Ungarn fær stig frá Fraklandi í dystinum, ið byrjar klokkan 17, og somuleiðis tørvar íslendingum, at Egyptaland vinnur afrikanska meistaraskapið komandi sunnudag.
Tað er 25-33 tapið fyri Ungarn, ið nú kann gerast íslendingum sera dýrt í hesum roknskapinum.
Íslendingar vóru á odda 14-8 í steðginum. Teir høvdu eina gylta løtu har teir fóru frá javnleiki 8-8 til eina 14-8 leiðslu. Fyrra korterið í seinna hálvleiki steðgaðu íslendingar upp, og teir skutu bert tvey mál. Men seinna korterið reistust teir aftur og knógvaðu sigurin heim.
Eysturríki - Ísland 24-26 (8-14)
Eysturríki : Tobias Wagner 7, Robert Weber 5, Mykola Bilyk 4, Boris Zivkovic 3, Lukas Hutecek 2, Markus Mahr 1, Sebastian Frimmel 1, Lukas Herburger 1.
Ísland : Sigvaldi Guðjónsson 8, Aron Pálmarsson 7, Viggó Kristjánsson 3, Haukur Thrastarson 3, Elliði Viðarsson 2, Janus Daði Smárason 2, Ómar Magnússon 1.
Klokkan 19.30 í kvøld spæla Týskland og Kroatia. Fær Týskland stig í dystinum møta teir Danmark í hálvfinaluni komandi fríggjakvøld.
Støðan:
| Nr. | Lið: | Dystir | V | J | T | Málmunur | Stig | |
| 1 | Frakland | 4 | 4 | 0 | 0 | 139:122 | 8 | |
| 2 | Týskland | 4 | 2 | 1 | 1 | 113:107 | 5 | |
| 3 | Ungarn | 4 | 2 | 0 | 2 | 119:116 | 4 | |
| 4 | Eysturríki | 5 | 1 | 2 | 2 | 132:138 | 4 | |
| 5 | Ísland | 5 | 2 | 0 | 3 | 142:152 | 4 | |
| 6 | Kroatia | 4 | 0 | 1 | 3 | 116:126 | 1 |
