Erling aftur á blettium

Fyrstu dystirnir í 6. umfari í Premier League vóru í gjár. Dagurin byrjaði við grannauppgerð í Liverpool, har Everton og Liverpool deildu stigini í málleysum javnleiki. Dysturin var ikki heilt uttan dramatikk og bæði liðini raktu stengurnar, og kunnu málverjunum fyri, at tey fingu eitt stig.

Manchester City er stórfavorittur at vinna meistaraheitið aftur, men fyri aðru ferð í hesum kappingarárinum settu teir stig til. Sjálvt um Erling B. Haaland við einum ordans lopi legði Manchester City á odda, so javnaði Leon Baily eitt korter fyri tíð. Erling B. Haaland hevur nú skotið tíggju mál í seks dystum.

Chelsea hevur veruliga brúkt nógvar pengar í summar, men úrslitini og spælið hevur ikki stað mát við tað. Tí var eitt ávíst trýst á tað løtuna, tá West Ham var á odda 1-0 í seinna hálvleiki á Stamford Bridge. Heimaliðið megnaði tó at venda tí við málum frá Ben Chilwell og Kai Havertz. Gestirnir fingu eitt mál kolldømt móti endanum og vóru í øðini um tað.

Tottenham hevur fingið ein skilagóða byrjan upp á kappingarárið. Tað stendur við eftir 2-1 sigur á Fulham á heimavølli. Harry Kane var millum málskjúttarnar hjá Tottenham, meðan Aleksandar Mitrovic skoraði sítt fimta mál í bara seks dystum fyri Fulham.

Ivan Toney skoraði hattrik, tá Brentford vann 5-2 á Leeds United, sum fekk venjaran útvístan. Newcastle og Crystal Palace  spældu málleysan javnleik. Nottingham Forest, sum hevur keypt 21 spælarar í summar, tapti 3-2 á heimavølli móti venjaraleysa AFC Bournemouth, eftir at hava verið á odda 2-0.

Tveir dystir eru í dag. Brighton tekur á heimavølli móti botnliðnum Leicester, og Manchester United fær vitjan av Arsenal klokkan 16.30.