Súsanna Dam
Hugsi um ta viðgerð yvirtøkan av fólkakirkjuni hevur fingið og fær. Í løtuni tykist mest sannlíkt at fólksins kirkja bara skal avreiðast til hægstbjóðandi.
Í Føroyum er fólkakirkjan og hennara læra høvuðsgrundarlagið undir siðalags- og mentanartilvitanini hjá einum stórum meirluta av fólkinum, enntá so nógvum, at vit kanska hava kvalificeran meiriluta, tá til stykkis kemur
Hóast hetta sýnist sum innan løgting og millum onnur, ið taka avgerðir, eru holdningarnir sera jánkasligir, fyri ikki at siga líkasælir. Eitt skirvni, ið einki hevur við tolsemi at gera, og at halda at tolsemi loysir spurningin, so øll verða nøgd, kann tykist avbera fávitskut.
Hví ikki ásanna at evstu áhugamálini hjá fólkakirkjuni og fríkirkjunum eru beinleiðis øvugt av hvørjum øðrum.
Mær tykir nærum, at okkara politikkarar, sita á oyrunum, tá harðmæltir fríkirkjumenn royna at sannføra um sínar bíbilsku kunngerðir og religiøsa orðabrask.
Fólkakirkjan hevur havt brúk fyri hvørjum einstøkum okkara uttan treytir, og hevur tikið ímóti okkum í tí støðu, vit nú einaferð eru stødd í, uttan mun til hvat umheimurin annars skuldi ditta sær at hildið um okkara religiøsa habitus og etiska forfall. Verða hesi viðurskifti broytt í yvirtiknu kirkjuni, er helst betur at taka hana av beinanvegin, nýta peningin til okkurt annað skilabetri og lata fríkirkjurnar orðna restina.
Tala hagtølini rætt so eru 4 av hvørjum 5 føroyingum limir í fólkakirkjuni, og tað eiga politikkarar at hava fyrilit fyri, tá teir taka avgerðirnar. Á ongan hátt eigur at verða samanborið við fríkirkjurnar, tær tæna heilt einfalt ikki sama endamáli sum fólkakirkjan, og tí mugu tey, sum varða av henni, skilja og samtykkja innihaldið í hugtakinum “fólkakirkja”, so einfalt, men at vísa seg sera trupult at seta í verk.
