Í morgun undirritaðu Jacob Vestergaard, fiskimálaráðharri, og Emma Hopkins, bretsk sendifrú í Keypmannahavn, karmsáttmála um fiskiskap millum Føroyar og Bretland.
Tá hesin sáttmáli er komin í gildi, eftir at Løgtingið og bretska tingið eftir ætlan hava samtykt hann seinni í ár, verður hann karmurin um alt fiskivinnusamstarv millum Føroyar og Bretland í komandi tíðum.
Samráðingarnar um henda sáttmála hava gingið væl landanna millum og serstakliga tí at viðurskiftini millum sendinevndirnar hava verið stak góð.
Sáttmálin fevnir í høvuðsheitum um tær meginreglur, sum eitt slíkt fiskivinnusamstarv millum londini bæði skal virka eftir í framtíðini.
Týdningarmestu ásetingarnar fevna um atgongd, kvotuflytingar og eftirlitssamstarv. Harumframt er ásett, at londini bæði raðfesta vísindaliga grundaða umsiting av fiskastovnum og at sjøtul verður settur á samstarv um havlívfrøði og havumhvørvi. Øll hesi viðurskifti fara at verða viðgjørd í teimum árligu samráðingunum landanna millum.
Jacob Vestergaard sigur, at hetta er ein søguligur dagur fyri viðurskiftini millum Føroyar og Bretland. At sáttmálin er undirritaður er ein varði í okkara felags søgu og eitt stórt framlop í felags royndum okkara at framhaldandi menna samstarvið millum tjóðirnar báðar.
Hann sigur víðari, at hann er serstakliga væl nøgdur við tað álitisvekjandi og uppbyggjandi samstarv, sum er komið í lag millum føroyskar og bretskar ráðharrar og embætisverkið í londunum báðum.
