Hetta vikuskiftið er 23. og fimti síðsta umfar í næstbestu fótbóltsdeildini. Longu í gjárkvøldið hevði B36 vitjan av NSÍ. Undan uppgerðini í Gundadali høvdu bæði liðini 31 stig. B36 vann 3-0, og harvið er árstalsfelagið greitt á fjórða plássi.
Seinnapartin eru hinir fýra dystirnir. FC Suðuroy og 07Vestur eru í tættari kapping um næstfremsta plássið og harvið uppflyting saman við suverena toppliðnum TB. Í dag skulu bæði FC Suðuroy og 07Vestur spæla á útivølli.
FC Suðuroy er á veg í Gundadal, har HB bíðar. Tað kann fara at vísa seg at vera stórur biti hjá útiliðnum. Fyrr í ár hava liðini spælt tvær ferðir á Vágseiði. Í fyrra førinum vann FC Suðuroy 3-2, og í seinna førinum vann HB 4-3. Hetta var á jóansøku, og síðani hevur HB ikki tapt. Tað hevur borið við sær, at HB nú hevur góðan møguleika at sleppa undan niðurflyting. Fyrr í ár sá tað annars heilt svart út.
07Vestur er á veg til Leirvíkar. Tá ið Víkingur og 07Vestur flaggdagin hittust á sama vølli, endaði tað 1-1. Í Sandavági vann 07Vestur 28. juni 3-1.
TB fær seinnapartin vitjan av teimum næstbestu hjá KÍ, sum kappast við HB um at sleppa undan niðurflytingarplássi. Flaggdagin vann TB 3-2 í Klaksvík, og 28. juni vann TB 3-0 á KÍ við Stórá.
TB tapti fyri viku síðani 1-0 á heimavølli ímóti Víkingi. Hetta var fyrsta TB tapið í ár. Tað eru fimtan stig eftir at spæla um, og harvið hevur TB framvegis møguleika at seta met í 1. deild. Stigametið eigur B68, sum í 2007 vann deildina við 72 stigum. Nú hevur TB 59 stig.
EB/Streymur er aftast. Í dag vitjar AB við Margáir. Um tað ikki eyndast heimaliðnum at vinna fulla úrtøku, so verður støðan heilt hættislig. Fyrr í ár hava liðini tvær ferðir spælt javnt. Flaggdagin endaði tað 1-1 í Streymnesi, og 27. juni endaði tað 2-2 á Argjum.
Í gjár
B36-NSÍ 3-0 (1-0)
1-0: Heini í Skorini 32.
2-0: Robert Heðin Brockie 70.
3-0: Eli F. Nielsen 90.
Í dag
Víkingur-07Vestur: Jón Kári í Brekkuni kl. 15.00
EB/Streymur-AB: Rúni Gaardbo kl. 17.30
HB-FC Suðuroy: Kim Poulsen kl. 15.00
TB-KÍ: Eiler Rasmussen kl. 14.45
Støðan
TB 59
FC Suðuroy 38
07Vestur 37
B36 34
NSÍ 31
AB 27
Víkingur 25
KÍ 22
HB 20
EB/Streymur 16
B36 og NSÍ hava spælt 23 dystir, og hini liðini hava spælt 22 dystir.
