Tríggir ákærdir eru dømdir tíggju daga treytaða fongsulsrevsing í einum máli um harðskap á umstrídda danska kostskúlanum í Herlufsholm, meðan tveir eru dømdir dagbøtur, hevur landsrætturin í Næstved gjørt av.
Rætturin metir, at dreingirnir eru sekir í harðskapi, men fríkennir teir fyri ákæruna um ólógligan tvingsil.
Teir báðir dreingirnir, sum skulu gjalda dagbøtur, skulu gjalda fýra dagbøtur á 500 danskar krónur hvør.
Teir fimm dreingirnir, sum tá brotsverkið varð framt, 31. mai 2023, vóru í 9. flokki á kostskúlanum, vórðu ákærdir fyri harðskap við at hava givið tveimum næmingum úr 8. flokki træbein og ólógligan tvingsil við at hava noytt teir at eta chips, sum ein av ákærdu hevði nortið við kynslimi sínum.
Í grundgevingini fyri dóminum leggur dómarin dent á forkláringarnar hjá teimum báðum ofrunum. Hann greiðir frá, at frásagnirnar eru trúverdugar og samsvarandi tí, sum teir báðir søgdu einum sovilærara sama kvøld, hendingin fór fram.
Ákæruvaldið hevði eisini biðið um, at dreingirnir fáa sítt mál viðgjørt hjá Ungdómskriminalnevndini. Rætturin hevur einki grundarlag funnið fyri hesum.
Teir tríggir dreingirnir, sum hava fingið treytaða dóm, noyðast ikki at sita dómin í fongsli, uttan so at teir fremja nýggj brotsverk.
Málið hevur koyrt í tríggjar dagar í Rættinum í Næstved.
/ritzau/
