Finski forsetin, Sauli Niinistö, væntar, at hann fer at fáa grønt ljós til finskan Nato-limaskap, tá hann hittir turkiska forsetan, Recep Tayyip Erdogan í Turkalandi í hesi vikuni.
Í telduposti til tíðindastovuna Reuters skrivar finski forsetin, at Erdogan ynskir, at teir báðir hittast "forseti til forseta", tá hann er til reiðar at góðkenna umsóknina hjá Finnlandi.
Fyrr í dag gjørdist tað alment, at Sauli Niinistö verður í Turkalandi í morgin og fríggjadagin, og at hann fer at hava samrøður við turkiska forsetan undir vitjanini.
- Millumtjóða viðurskifti og finska umsóknin um Nato-limaskap eru mál, sum verða umrødd á fundinum í Istanbul, verður upplýst av forsetaskrivstovuni hjá Recep Tayyip Erdogan.
Í Turkalandi verður sagt, at turkiska tjóðartingið ætlar at góðkenna finsku Nato-umsóknina fyri forsetavalið í landinum, sum verður í mai.
Sagt verður eisini, at umsóknin hjá Svøríki um Nato-limaskap verður viðgjørd fyri seg - og ikki saman við umsóknini hjá Finnlandi.
Turkaland og Ungarn eru einastu lond í Nato-verjusamgonguni, sum telur 30 lond, ið enn ikki hava góðkent umsóknirnar hjá Finnlandi og Svøríki.
Fyri at lond, sum ikki eru limir í Nato, skulu kunna gerast limir í samgonguni, er neyðugt, at øll verandi limalond taka undir við umsóknini.
Tað er tíðindastovan NTB, sum ber hesi tíðindi í dag.