- Sambært okkara yvirliti eru vit í løtuni 2.018 fólk í Eysturkommunu, og eg haldi, at fólkatalið hevur ein "tendens" til at veksa.
Tað sigur ein vælnøgdur Jóhan Christiansen, borgarstjóri í Eysturkommunu, sum in.fo hitti í Leirvík í dag.
Hann vísir á, at fólkatalið í kommununi, sum fevnir um Leirvík og Gøtu, gjørdi eitt "dýkk" fyri umleið trimum árum síðan, tá tað kom niður á 1930.
- Men, síðan eru vit vorðin fleiri aftur, og sambært yvirlitinum, sum Landsfólkayvirlitið sendi út fyrr í ár, hevði Eysturkommuna yvir eitt ár størsta fólkavøksturin - næst eftir Tórshavnar kommunu.
Borgarstjórin vísir á, at tá summarið er av, og heystið stundar til, minkar fólkatalið í kommununi nakað - av náttúrligum ávum, sum hann tekur til.
- Fólk fara av landinum at lesa og annað, men eg haldi ikki, at vit her í Eysturkommunu missa nógv fólk til aðrar kommunur, sigur Jóhan Christiansen.
Í løtuni verður vegur gjørdur til eina nýggja útstykking í Syðrugøtu, og her verða tey fyrstu grundøkini klár at selja tíðliga í heyst.
Næst eftir Syðrugøtu, verður útstykkjað í Leirvík, tí í Leirvík eru eingi grundøki eftir. Í løtuni verða eini 3-4 sethús bygd í Leirvík.
